Այն մթերքների ցուցակը, որոնցից առավել հաճախ են թունավորվում ամռանը, գլխավորում են կրեմով տորթերը, ձմերուկը և պաղպաղակը: 

Մեծերի և փոքրերի կողմից այդքան սիրելի պաղպաղակի նախատիպը գոյություն է ունեցել դեռևս 3000 տարի առաջ Չինաստանում: Այնուհետև արդեն միջին դարերում այն համարվում էր բավականին թանկ, բարդ պատրաստվող և թագավորների սիրելի դեսերտի տեսակ:

Ժամանակակից պաղպաղակը ձևավորվեց 18-րդ դարի կեսերին և ներթափանցեց Ռուսաստան: Այստեղ արդեն վաղուց սառեցված կաթը դարձել էր «ազգային ուտեստ», սակայն միայն ԽՍՀՄ սննդաարդյունաբերության ղեկավար Անաստաս Միկոյանը՝ 1930-ական թվակններին, օգնեց արհեստական սառույցի արտադրության արագ զարգացմանը և խորհրդային Միությունում պաղպաղակի տարբեր տեսակներ արտադրելուն: Ժամանակի ընթացքում արտադրության մեխանիզմները փոփոխվեցին ու «կատարելագործվեցին»:

Այսօր Հայաստանում գործում են պաղպաղակների արտադրությամբ զբաղվող մի քանի գործարաններ: Դժվար է ասել, թե դրանցից քանիսն են հետևում սովետական եղանակին, քանի որ և՛ ժամանակներն են փոխվել, և՛ պատրաստման տարբերակները: Արտադրության արագացումից ու ծախսերի պակասեցումից զատ, պաղպաղակների որակի և անվտանգության մասին եզրահանգում անելու համար պետք է հարցնել մեր ծնողներին և բժիշկներին: 

Իսկական պաղպաղակի բաղադրության 50% -ը պետք է բաղկացած լինի կաթից, բայց քանի որ կաթը բավականին թանկ է, նախ փոխարինելու եկավ կաթնային յուղը, վերջինիս էլ՝ բուսական յուղը: Այսպիսով, այն պաղպակները, որոնք պատրաստված են բուսական յուղից արագ հալչում են և կարող են ալերգիկ ռեակցիաներ առաջացնել: Վտանգավոր են հատկապես մրգային պաղպակները, որոնք պատրաստված են ներկանյութերից և քիմիական անհայտ համեմունքներից: 

Գնելիս ուշադրությոն դարձրեք ոչ թե պաղպաղակի գունագեղ զարդարանքին ու մուլտիպլիկացիոն կերպարների առկայությանը, այլ բաղադրությանը: Եթե կարողացաք կարդալ այդ փոքր շրիֆտով և գտաք «բուսական յուղ» բառակապակցությունը, ապա մի՛ գնեք այդ պաղպաղակը: Խուսափեք նաև լցնովի պաղպաղակներից, որոնց պատրաստման եղանակն առ այսօր գաղտնիք է շատերի համար և հիշեք՝ թանկից էժանը չկա: 

Հ.Գ. Ի դեպ արևմտահայերենով պաղպաղակին սառնանուշ էին անվանում. երևի համ սառն էր, համ անուշ, իսկ հիմա մենակ պաղությունն ա մնացել… 

Էքսկլյուզիվ ֆոտոշարք պաղպաղակ արտադրող հայկական գործարաններից.